تم مجھ سے پوچھتے ہو میں پاگل کیسے ہوا؟ یہ بات ایسے انجام پائی: بہت سے خداوندوں کی پیدائش سے طویل عرصہ قبل میں ایک دن گہری نیند سے بیدار ہوا اور پایا کہ وہ ساتوں مصنوعی چہرے، یعنی ماسک، جنہیں میں نے بنا کر ساتوں زندگانیوں میں پہنا تھا، وہ میرے سارے ماسک چوری کر لئے گئے تھے۔ میں بھیڑ والی گلیوں سے یہ چلاتے ہوئے دوڑا، ”چور، چور۔ لعنتی چور۔‘‘
خوا تین و حضرات مجھ پر ہنسے لگے اور کچھ لوگ میرے خوف سے بھاگ کر اپنے اپنے گھروں کے اندر گھس گئے۔
تب جب میں جائے بازار پہنچا تو ایک مکان کے سرِ بام کھڑا ایک جوان چلا اٹھا، ”وہ ایک سودائی ہے۔‘‘ میں نے اس کا دیدار کرنے کی غرض سے نگاہیں اوپر کی جانب اٹھائیں؛ آفتاب نے میرا عر یاں چہرہ خود پہلی بار چوما۔ پہلی مرتبہ مہرِ روشن نے میرے ننگے چہرے کا بوسہ لیا، اور میری روح میں سورج کے محبت کی آ گ پھیل گئی؛ پھر مجھے اپنی ماسکوں کی حاجت نہیں رہی۔ اس کے بعد وجد کی سی کیفیت میں، میں چلایا، ”فیض یاب ہوں وہ، رحمت برسے ان چورں پر جنہوں نے میرے نقاب و ماسک چرائے۔‘‘
اس طرح میں ایک پاگل آدمی بن گیا۔
اور اپنے پاگل پن میں، میں نے آزادی اور تحفظ، دونوں حاصل کئے ہیں، خلوت کی آزادی اور سمجھے جانے سے حفاظت، کیونکہ جو لوگ ہمیں سمجھتے ہیں وہ ہمارے اندر کی کسی نہ کسی چیز کو غلام بنا لیتے ہیں۔
لیکن کہیں مجھے اپنی سلامتی پر بہت زیادہ فخر نہ ہو۔ جیل میں تو ایک چور بھی دوسرے چور سے محفوظ ہوتا ہے۔
