میں اس سے چوراہے پر ملا، اس کے جسم پر صرف ایک چوغہ اور ہاتھ میں ایک عصا تھی، اور اس کا چہرہ درد سے زرد ہوا تھا۔ اور ہم نے ایک دوسرے کو سلام کیا، اور میں نے اس سے کہا، "میرے گھر آ کر میرے مہمان بنو۔"
اور وہ آ گیا۔
میری بیوی اور میرے بچے ہم سے برآمدے پر ملے، اور وہ ان پر مسکرایا، اور انھوں نے اس کی آمد کو بہت پسند کیا۔
پھر ہم سب دسترخوان پر ایک ساتھ بیٹھے اور ہم اس آدمی کے حوالے سے خوش تھے کیونکہ اس کےساتھ ایک خاموشی اور ایک راز وابستہ تھے۔
اور رات کے کھانے کے بعد ہم آ گ کے گرد جمع ہوئے اور میں نے اس سے اس کی سیر و سیاحت کی بارے میں پوچھا۔
اس رات، اور اگلے دن بھی، اس نے ہمیں بہت ساری کہانیاں سنائیں، لیکن فی الحال جو میں لکھنے جا رہا ہوں وہ ان دنوں کی تلخی سے پیدا شدہ ہے، اگرچہ وہ بذاتِ خود پر شفقت تھا؛ اور یہ کہانیاں اس کے راستے کی دھول اور صبر کے بارے میں ہیں۔
اور تین دن کے بعد، جب وہ ہمیں چھوڑ کر گیا، تو ہمیں یہ نہیں محسوس ہوا کہ ایک مہمان چلا گیا، بلکہ ہمیں یوں لگا کہ ہم میں سے ہی ایک فردِ کنبہ اب بھی باہر باغیچے میں ہے اور ابھی واپس اندر نہیں آیا ہے۔
